Dr RUDASINGWA- UMUNSI W’UBWIGENGE BW' URWANDA ISHYAKA ISHAKWE-RFM RIWUBONA GUTE?

Tariki ya 1 Nyakanga wari umunsi u Rwanda rwagombye kwizihizaho Isabukuru y’imyaka 59 rubonye ubwigenge. Kuri iyo tariki ya 1 z’ukwa 7, mu mwaka w’1962, ni ho ibendera ry’Ububiligi bwari bukoronije u Rwanda ryururutswaga, hazamurwa ibendera rishya rya Repubulika y’u Rwanda yari yemejwe burundu na Kamarampaka yo kw’itariki ya 25 Nzeri 1961, ari na ko haririmbwa indirimbo RWANDA RWACU yubahiriza igihugu. Isabukuru y’ubwigenge bw’u Rwanda yubahirizwaga bikomeye ku ngoma ya Repubulika ya 1 yayobowe na Perezida Gerigori KAYIBANDA. Byaje gukendera muri Repubulika ya 2, aho Perezida Yuvenali HABYARIMANA yashyize imbere itariki ya 5 Nyakanga yakoreyeho kudeta mu mwaka wa 1973. Ni kuri iyo tariki ya 5 Nyakanga kandi, mu mwaka w’1975, Perezida HABYARIMANA yashingiyeho ishyaka rukumbi rya MRND. Bimenyerewe ko ku ngoma ya FPR-Inkotanyi yagiyeho tariki ya 04 Nyakanga 1994, iyo tariki y’ubwigenge itubahirizwa. Ibiri amambu, ejobundi tariki ya 1 Nyakanga 2021, Perezida Paul KAGAME yohereje Ministre w’Intebe NGIRENTE kumuhagararira mw’isabukuru ya 59 y’ubwigenge bw’u Burundi, bwabereye rimwe n’ubw’u Rwanda mu wa 1962. Kutubahiriza amatariki akomeye mu mateka y’igihugu, nka Kamarampaka yazanye Repubulika, n’Ubwigenge, ni igikomere mu mibereho yIgihugu n’Abanyagihugu. Nk’abana b’u Rwanda bigishwa ayahe mateka ? Amateka azajya yandikwa uko ingoma igiyeho ? Ni uwuhe muti dutanga nk’Ishyaka Ishakwe-Rwanda Freedom Movement?

Umutumirwa: Dr Theogene Rudasingwa
Uwateguye ikiganiro: Joseph Ngarambe
Radio Ishakwe, 05.07.2021