Perezida Kagame arasaba Abanyarwanda kutita ku by’inkunga

Perezida wa Repubulika Paul Kagame arasanga abanyarwanda bakwiye guhindura imyumvire bagakora bashyizeho umwete batitaye ku ihagarikwa ry’inkunga z’amahanga, kuko ngo na mbere y’ihagarikwa ry’izo nkunga hariho gahunda yo kureba icyakorwa kugira ngo igihe ni kigera u Rwanda ruzacuke ku nkunga zayo.

Ibyo Perezida wa Repulika yabivuze kuri uyu wa mbere mu kiganiro yagiranye n’abanyamakuru muri Village Urugwiro.

Kimwe mu byagarutsweho muri icyo kiganiro ni ihagarikwa ry’inkunga z’amahanga ryakozwe na bimwe mu bihugu by’amahanga mu mpera z’umwaka ushize.Icyo gihe bikaba byarahuriranye n’itangizwa ry’ikigega cy’igihugu cyo kwihesha agaciro aho abanyarwanda bakomeje gutanga imisanzu yabo ku bushake kandi uko umuntu ashoboye.